Rapport Hausstock, 16 e 17 da fenadur 2023

Sin viseta ellas Alps glarunesas

Igl emprem gi meina Clau nossa gruppa dall'Alp Quader sur Breil en direcziun Pass Lembra. La viagiada ei ina buna caschun per filosofar davart la bellezia dalla natira ed il panorama che circumdescha nus. Era sche la nebla impedescha quei gi da veser cumpleinamein ils pézs maiestus sco ils Cavistrai, il Durschin ed il Péz Russein, mauncan ils highlights buc. Sper las pradas verdas e las crestas tgiet, fascineschan il Muot da Rubi cun sia fuorma speciala ed ils camutschs e capricorns ch'ein d'observar entuorn il Péz d'Artgas.

Biala survesta ed ina notg emperneivla

Era la vart glarunesa culla cuntrada crappusa e la vesta sils lags da fermada da Limmern e Muttsee lai smarvegliar Clau, Maya, Claudio, Giuanna e Selina. Malgrad l'aura empau malsegira restan las jaccas da plievgia el sacados tochen a nossa finamira digl emprem gi, la tegia da CAS Muttsee. Leu marscha zatgei, sper ils hosps usitai carmala la vesta spectaculara giu d'in plateau cul lag da fermada Limmern ella profunditad ed il Muot da Rubi el lontan, influencers ch'ein alla catscha dalla megliera fotografia. Suenter haver dau empau la bucca da quellas e quels che fan tenda per survegnir ils maletgs spectaculars, sa ina part dalla gruppa buc schar d'era examinar il liug enconuschents sin instagram e consort.

En la tegia datti ina buna tscheina, nua che la squadra da cuschina ha buc spargnau cun pischada. Nus selegrein sin la tura e passentein la sera cun dar Yatzy e 21. Suenter ina notg surprendentamein ruasseivla, eisi da levar baul. Deplorablamein sto Claudio desister dalla tura, el ei empau en auras ed ha strusch saviu durmir. Aschia che Clau, Maya, Giuanna e Selina prendan la via sut ils peis viers il Ruchi ed il Hausstock. L'idilla dalla damaun ei palpabla, il sulegl che leva, semischeida cun la tschaghera e porscha in spitachel natural. Sil pli tard cun viagiar dalla costa si viers il Ruchi turnein nus anavos ella realitad - la tessaglia far ir siado il puls, la glera fina sut las solas dils calzers lai turnar miez pass anavos cun far in pass anavon. Dumignau quels meters d'altezia sepresenta nossa finamira per l'emprema ga: Il Hausstock sclerius dil sulegl matutin, quella biala vesta motivescha.

En suga

Suenter ch'il Ruchi ei contonschius - daventa la tura pli tecnica, avon che traversar la cresta viers il Hausstock, mein nus en suga, pertgei dretg e seniester vai lunsch ella profunditad. Suenter quella cuorta passascha suondan tocs da reiver e da caminar. Tgi sin tuts quater e tgi si dretg contonschin nus il Hausstock. La vesta ei fenomenala, era sche las neblas ein buc svanidas diltut. Clau, Maya, Giuanna e Selina gaudan la miersa el sandwich ni Farmer, sin 3'158 meters sur mar gusta quella specialmein bein.

Mo tgi che va ensi sto era ir engiu: quella ga vai sin la vart digl ost puspei direcziun Surselva. Malgrad che bia crappa ei libra ed il terren para magari da scappar sut ils calzers funcziunescha tut bein cun reiver giu dil péz. Tuttina, igl ir engiu ei liung - en tut varga 2'000 meters d'altezia tochen giu Pigniu. La davosa ura va ellas combas ed ella ganuglia e lai barschar ils peis. Ton pli bein fai da sesferdentar giu Pigniu en in begl e selegrar dalla tura zun gartegiada.