Sulzfluh (Grep marsch) 2817 m + Drusator (Porta Drusa) p. 2407 m

Cunquei che tuts partiziponts ein da lieunga romontscha (quater Sursilvans ed in collega dalla Muntogna da Schons), selubeschel da scriver inagada il rapport dalla tura da secziun sin lungatg mumma.

Partenza a Sogn Antönia allas 07.30 uras cun ina temperatura frestga da -4°c. Il tschiel lev curclau empermetta da sefar si entochen miezdi. Suenter mo 3 uras essan gia arrivai sin la Sulzfluh, nua che nus havein astgau guder résch persuls il fantastic panorama. Ei mava in vent freid, aschia che la pausa ei curdada ora cuorta. Uss stat la renomada descensiun dil 'Rachen' avon nus. Malgrad ch'ei ha buca memia bia neiv, havein astgau guder biala puorla dallas teissas spundas giuaden. Ina cuorta passascha heiclia cun pauca neiv havein surmuntau a pei. Silsuenter hai giu num da montar las pials e filar tras il bi uaul da 'Porzalenga' entochen tier la camona da Lindau sin 1744 m. L'entira descensiun dalla Sulzfluh cun la cunterascensiun ha cuzzau suletamein 1 ¼ ura. Punctuals sco ina ura Svizra essan arrivai da miezdi sin gentar en la camona da Lindau, nua che havein astgau schar gustar in tatsch digl imperatur (Kaiserschmarren). In avis general: ina purziun pintga ei absolut suffizienta; ina purziun 'normala' savess caschunar disturbis digestivs cun la proxima stenta dalla ascensiun.

Allas 13.00 uras havein priu a mauns la secunda part dalla tura. Cun venters pleins ha ei valiu d'ascender l'etappa entochen sin la Porta Drusa 2341 m. Deplorablamein ha ei zugliau en ina spessa nebla, aschia che nus havein buca saviu guder il bi panorama sin las treis renomadas tuors dil Drusenfluh. Quasi en sgol tschiec ha Ignaz menau nus dil cuolm siadora en temps da record. Cun s'orientar vid l'enconuschientscha locala ed il sistem da navigaziun ha ei tuttina dau ina pintga divergenza dallas coordinatas. Aschia essan arrivai sin in punct da 2407 m, pia sur la Porta Drusa. Gest en quei mument rumpa la spessa nebla si e nus astgein guder in bellezia tschiel blau cun imposanta pézza entuorn ed entuorn.

Ussa suonda la davosa etappa dalla tura cun descensiun spèr la camona da Carschina ora entochen anavos tier il liug da partenza. Allas 16.00 uras essan arrivai sauns e cuntents anavos a Sogn Antönia.

Quella etappa da muntogna porscha ina interessanta cumbinaziun d'ina cuntrada nundetg impressiunonta cun ina excursiun tier nos vischins Austriacs ed ei ina veritabla prestaziun atletica (2'150 meters d'altezia, repartgi sin 23.5 km lunghezia ed in cuoz da varga 7 uras en moviment).

Grond engraziament ad Ignaz per menar nus segir dil cuolm si ed engiu - ed in bien engraziament a tuts partiziponts per la biala e buna cumpignia dils Terrians.

07-03-2023 / David