Skitour mit Hüttenübernachtung

Chrützlistock | Camonna d'Etzli | Péz Giuv 3096

Reto, Ida, Lucas, Simon, Ramona, Seraina, Philipp, Clau

24 e 25 da mars 2018

Atgnamein fuss gie stau planisau d'ir sil Péz Tschietschen l'emprem gi. Muort la situaziun da lavinas havein denton re-planisau e fatg il viadi viers la camonna d'Etzli sur il Chrützlistock. Aschia essan nus gest suenter la sentupada a Mustér carrai vinavon viers la Val Milà. L'emprema gruppa da quei gi sin il Chrützlistock, havein lura munchentau grazia al vent (ni forsa grazia al menader) da far ina pausa da miezgi avon ch'arrivar en la tegia d'Etzli entuorn las duas. Cun ina massa temps en tegia ha la gruppa giu la pusseivladad d'emprender ina ni l'autra regla da giug e tactica da gudignar per dar Trent'in e guder il gi era suenter la puorla che nus havein anflau en enqual part dalla plaunca dil nord giu dallas Mittelplatten.

Il proxim gi - tgei cletg senza munchentar l'ensolver muort la midada da temps - havein cumenzau il retuorn viers il Péz Giuv. Sisum ils 3096 meters havein giu biala vesta vers sid sin Scopi, Adula ed il glatscher da Medel, e quella ga havein schizun giu il temps da magliar il paunet runau dus gis cun nus! Sin via engiu tras la Val Giuv tochen a Sedrun havein lu giu plitost crusta, giudem ina part cun l'emprem sulz dalla sesiun (la fin mars!). La finiziun figein - sco'i sauda a Sedrun - en l'ustria Sudada cun in café.

Era sche la varianta sur Péz Tschietschen e Chrützlipass ha buca funcziuna, era sche la neiv ei buca stada la pli fina puorla per mintga plaunca, ed era sch'il material ha pretendiu in ni l'auter tric tier entgin, la pli sempla regla da turas da secziun resta: sche la glieud e la luna constat ei quei schi liung sco lad. Grazia per il temps ed il rir, gleiti puspei!   Clau